Степанова Мария Софроновна

Степанова Мария Софроновна

         Биhиги ийэбит, Степанова Мария Софроновна 1925 сыллаахха Чуукаар нэhилиэгин Маар түбэтигэр Төлөөнө аҕатын ууhугар төрөөбүтэ. Сэрии ыар кэмигэр ииппит ийэтэ уонна түөрт бииргэ төрөөбүттэрэ хоргуйан өлбүттэр. Төгүрүк тулаайах хаалбытыгар таайдара Өҥөлдьөҕө илдьэннэр тыыннаах хаалбыт уонна дьоно суох буолан оскуолаҕа кыайан үөрэммэтэх. 1945 сыллаахха Малдьаҕарга Көнтөстөөх диэн сиргэ аҕатын кытта бииргэ төрөөбүт эдьийигэр Чээчэ ойоҕо Маайаҕа олоро кэлбит. Кэлээт даҕаны 1-кы Малдьаҕар "Коминтерн" холкуоhугар үлэлээбитинэн барбыт. Онтон 1955 сылтан биэс сыл устата Тумаhахха Лесной оскуолаҕа дьиэ сууйааччынан, ас астааччынан үлэлээбит. Оскуола сабыллыбытыгар холкуоhугар төннүбүт.
    1-кы Малдьа5ар Дьахтар Күөлугэр олорор, 15 оҕоттон биэстэрэ эрэ тыыннаах хаалбыт ыалга бастакы оҕонон төрөөбүт, 50 саастаах Степанов Александр Михайлович-Сөккөөн Мэхээлэтин уолугар 1957 сыллаахха кэргэн тахсыбыт. Өлөксөөн кыратыттан доруобуйатынан мөлтөх да буоллар, оччотооҕу оҕо сиэринэн тыа үлэтин барытын үлэлээн улааппыт буолан "Коминтерн" холкуос төhүү үлэhитэ буолбута. Сэрии сылларыгар утуйарын да умнан харса суох үлэлээн-хамсаан, бииргэ төрөөбүт бырааттарын Ыстаппааны уонна Сэмэни хоргуйан өлүүттэн өрүhүйбүт. Онтон Ньурбаҕа алмаас күндү тааһы кердүүр, чинчийэр үлэтин ыыта Амакинскай экиспэдииссийэ кэлбитигэр, аны экиспэдииссийэ үлэһиттэригэр атынан таһаҕаһы таспыта.
    Аҕабыт чиэhинэйинэн, толоругаhынан, кыайыгаhын, хайҕанар үлэhит этэ. Холкуоска совхоз тэриллиэр диэри үлэлээбитэ. Онтон 1966 сылтан 1973 сылга диэри оскуолаҕа оробуочайынан, о.э. мас хайытан кылаас аайы баар улахан кирпииччэ оhохтору оттооччунан, түүҥҥү харабынайынан, хаар күрдьээччиннэн онтон да атын бүппэт үлэни толорооччунан бэриниилээхтик үлэлээбитэ. 1978 сыллаахха ыараханнык ыалдьан олохтон туораабыта. Ийэбит аҕабытын кытта бииргэ оскуолаҕа муоста сууйааччынан киирбитэ уонна пенсияҕа тахсыах диэри үлэлээбитэ.
   Дьоннорбут ыал буолан алта оҕону төрөтөн, үөрэхтээх үлэhит дьон оҥортообут улуукан үтүөлээхтэр. Билигин бары ыал буолан оҕолордоохпут, сиэннэрдээхпит.
    Онон, ийэлээх аҕабытын алта оҕолоро ааттарын ааттата сылдьабыт уонна кэнэҕэски уон биэс сиэннэрэ,хос сиэннэрэ эhэлээх эбэлэрин ааттарын ааттата туруохтара диэн эрэнэбит. Ийэбит Малдьаҕар сирин булан иккис дойду оҥостон, киhи-хара буолан, халыҥ аймах төрдө буолбутуттан улахан дьолунан ааҕынара.
   Сэрии сылларыгар ийэбит, Мария Софроновна уонна аҕабыт, Александр Михайлович-Сөккөөн Мэхээлэ уола Өлөксөөн Степановтар таhаарыылаах, бэриниилээх үлэлэрин иhин Сталин төбөлөөх мэтээллэринэн бэлиэтэммиттэринэн, биhиги, кинилэр оҕолоро, сиэннэрэ, хос сиэннэрэ КИЭН ТУТТАБЫТ!!!
    Ахтыыны суруйдулар оҕолоро:
Михаил Александрович;
Николай Александрович;
Зинаида Александровна;
Елена Александровна Степановтар;
Александра Александровна Протопопова;
Софрон Александрович Степанов.

2024 сыл.