Иванова Марфа Ивановна

Семенова Матрена Николаевна уонна Семенов Иван Афанасьевич диэн дьиэ кэргэҥҥэ Марфа иккис кыыс оҕонон күн сирин көрбүтэ. Кыра сылдьан сып-сырдык дьүhүннээх, уhун кугас хойуу баттахтаах, күлбүт-үөрбүт сэмэй кыыс этэ. Марфа дьүhүнүнэн аҕатын баппыт дииллэрэ. Аҕабытын "Маҕан уус", "Бааhынай" диэн ааттыыллар эбит. Аҕабыт улахан, сырдык киhи, маhынан уhанар эбит. Араас миэбэли оҥорорун кыратык өйдүүбүн.
Марфа оҕо сааhа Ньурбаҕа ааспыта. Сайынын улахан эдьийин Маргаританы кытары сопхуоска Дьаархаҥҥа оттоhор этэ. Ньурба бастакы нүөмэрдээх оскуолатыгар үөрэммитэ, ахсыс кылаас кэнниттэн Дьокуускай куоракка бэтэринээр үөрэҕин бүтэрбитэ. Техникуму үөрэнэн бүтэрэн кэлэн Мархаҕа сопхуоска үлэлээбитэ. Кэлин сопхуос ыhыллыбытын кэннэ Красноярскай куоракка иис үөрэҕэр үөрэнэн кэлбитэ. Дьоҥҥо өр сылларга түүлээҕинэн иистэммитэ: бэргэhэ, саҥыйах, унтуу тигэрэ. Онтон социальной үлэhит үөрэҕэр үөрэммитэ уонна кырдьаҕастарга үлэлээбитэ. Аhылыктарын астаан, дьиэлэрин сууйан-сотон, үлэ бөҕөнү көрөөччү. Онон кырдьаҕастар махталларын ылыан ылар этэ. Киирэпкэ олорбута, өр сылларга дьахтар сэбиэтин бэрэссэдээтэлинэн үлэлээбитэ. Киирэпкэ буолар араас тэрээhиннэр барыта кинитэ суох буолбат этэ. Сүрдээх аhыныгас, кырдьаҕаска-кыаммакка, элбэх оҕолоох ыалларга барыларыгар көмөлөhө сатааччы.
Марфа ытык сирдэргэ улуу Киhилээх, Сата, Харама хайаларыгар сылдьыбыта. Онон сүрдээх духовнай киhи этэ. Аар айылҕаны кытта үлэни, сиэри-туому барытын тутуhар уонна уу дьылыччы сылдьан айылҕаны кытта үлэни барытын бэйэтэ толорор этэ.
Нэhилиэгин олохтоохторо, салалтата Марфа сэмэй үлэтин "Таркаайы нэhилиэгин бочуоттаах олохтооҕо" бэлиэтэ, эдбэх махтал суруктара туоhулууллар.
Суруйда балта Тамара ивановна Петрова