Иванов Александр Иванович

1995 сыл ахсынньы ыйыгар «Олохтоох дьону промышленноска сыһыарыы» диэн Саха сирин Президенэ В. Штыров ыйааҕынан Накыыҥҥа алмааһы хостуур сиргэ үлэһиттэри хомуйуу буоларын истэн Ньурба улууһун Хорула дэриэбинэтиттэн туох баар докумуоммун, дипломмын илдьэ Ньурбаҕа киирбитим. Болдьоммут күҥҥэ зал иһигэр 200- тэн тахса киьи баар быћыылаах этэ. Онно АЛРОСА представителлэрэ уонна Ньурба бөһүөлэгин Үлэлээх буолуу киинин үлэһиттэрэ дипломнаах бульдозеристар, трактористар, суоппардар, ойуур солооччулар, геологтар, взрывниктар, электриктар, плотниктар, фельдшер наадалар диэн дьону сыымайдаан 33 киһини талбыттара. Мин фельдшерынан ылыллыбытым. Медосмотр эҥин aahaн баран 1996 сыл тохсунньу ый ортото бастакы вахта 15 киһи Ньурба оройуонунааҕы АК "АЛРОСА" представитэлэ Ариан Егорович Иванов арыаллаан бастаан Мииринэй куоракка бөртөлүөтүнэн көппүппүт. Онно Мархинскай партия начальнига Трещев көрсүбүтэ. Мин АК "АЛРОСА" медицинскэй пуунугар тиийэн инструктаж ааспытым, эмп бөҕө биэрбиттэрэ, кыра бэсиэдэ кэнниттэн ол күн Накыыҥҥа көппүппүт. Тиийээппитин кытта сулардыы бытыктаах участок тойоно Боровиков көрсөн тимир балоктарынан тарҕаппыта. Балоктар тимир оһоҕунан оттуллар этилэр. Утуйар мөһөөччүктэри биэртэлээбиттэрэ. Бастакы түүммүтүн онно хонон турбуппут. Тымныыта сүрдээх этэ. Овчинников Михаил диэн сулардыы бытыктаах киһи истиэнэҕэ сыста сыппыта сарсыарда балок истиэнэтигэр бытыга тоҥон хаалбытын сылаас уу кутан араарбыппыт. Сарсыныгар Боровиков миэхэ сыалай биир илдьирийэн хаалбыт балогы ыйан баран:”Бу манна медпункт буолар. Киирэн көрөн туох наадатын этээр. Барытын оҥоруохпут, буровойдары кэрийэргэр техниканнан хааччыйыахпыт. Пока мин балокпар кэлэн олороор”- диэбитин, - ”ээ, суох уолаттарбын кытта олоруом”- диэн аккаастаммытым. Дьэ итинник са5аламмыта мин үлэм Ботуобинскай экспедиция Мархинскай партиятыгар. Вахтабыт 15 күн этэ. Ол быыћыгар ыйга биирдэ Мииринэйгэ баран эмп ылар этим. Сыыйа дьону кытта билсэн үлэм этэҥҥэ баран испитэ. Күн аайы сынньалаҥмытыгар шахматтаан тахсааччыбыт. Аланныров Коля үчүгэйдик шахматтааччы. Күнүс дизелист оҕонньор үлэтин быыһыгар киирэн эмиэ шахматтааччыбыт, миэхэ кинигэ бэлэхтээбитэ. Бүтэһигэр олох да шахматист буолан хаалбытым. Тойоттору кытта шахматтаан билсэн, фелдьшертэн лесорубка көһөн хаалбытым. Xaмнaha олох үрдүк буолан үлүбээй дьону ылбаттар этэ. 2002 с. сокращениенан уурайбытым. (Иванов Александр Иванович ахтыыта, ыам ыйа, 2021 сыл).