Төрөппүттэрбинэн киэн туттабын
Аҕам Васильев Николай Васильевич 1922 сыллаахха Ньурба оройуонун Ньурбачааныгар дьадаҥы бааһынай дьиэ кэргэнигэр күн сирин көрбүтэ.
Ийэм Васильева (Егорова) Пелагея Ивановна 1926 сыллаахха Сунтаар оройуонун Ыгыатта Мэлэкэтигэр күн сирин көрбүтэ.
Кинилэр ыал буолан дьиэ туттан Ыраах Убайааҥҥа олохсуйбуттара. Ынах, сибиинньэ, куурусса иитэн, от оттоон, хортуоска олордон, оҕо-уруу төрөтөн ньир-бааччы олорбуттара. Сир аһын толору хомуйарбыт.
Аҕам Япония сэриитигэр сылдьыбыт. Сэрии туһунан олох кэпсээбэт этэ. «Сэрии аата сэрии, ынырык. Эһиги эйэлээх, үчүгэй олоххо олоруоххут» диэччи.
Сэрии барыан иннинэ «Наука Ленина» колхуоска үлэлээбитэ. Оттон кэлэн баран Маленкова аатынан НьЧыраабаНь колхуоска счетоводтаабыта. Сельсовет депутатынан талыллан үлэтэ кэҥээн, дириҥээн испитэ. Үлэлиир колхуоһа, дойдута сайдарыгар күүһүн харыстаабакка үлэлээбитэ.
Ийэм Ыраах Убайааҥҥа фермаҕа ыанньыксыттаабыта. Ферма үлэтэ кыһын да, сайын да олох бүппэт. Сарсыарда фермаҕа баран иһэн бэйэтин ынахтарын ыыр, көрөр-истэр. Киэһэ ферматтан кэлэн хотонугар киирэр.
Олох туруу үлэһиттэр. Кинилэр бу хантан күүс ылан үлэлээн-хамсаан, сүүрэн-көтөн, ыллаан-туойан, күлэн-үөрэн сылдьыбыттара буолуой?
Эһигинэн киэн туттабын!
Кыыстара Лидия Васильева