Долотов Иннокентий Дмитриевич

1994 сыллаахха Ботуобинскай экспедиция үлэһиттэрэ Накыын уонна Хайымыйа үрэхтэр икки ардыларыгар Дьахтар үрэҕин салаатыгар алмаастаах туруубканы булбуттара. Онтон киэҥ далааһыннаах тутуулар уонна чинчийэр үлэлэр саҕаламмыттара. 1995 сыл кыһыныгар Ньурба оройуонун дьаһалтата Ботуобуйа экспедициятын кытта кэпсэтэн, араас идэлэргэ үлэһиттэри 30 киһини 15-тии хонуктаах вахтанан үлэлииргэ хомуйбуттара. Бүтэһик киһинэн хапсан Накыыҥҥа үлэлии барбытым. Онно барыбытын араас үлэҕэ тыыран бэлэмнээбит этилэр. Мин Чайдахскай партияҕа икки буолан Мкртчан Сашкалыын 11-с буровойга анаммыппыт. Мкртчан помбурунан, мин тракториһынан үлэбитин саҕалаабыппыт. Инники вахтаҕа Дмитриев Афоня үлэлээбитэ. Ол кэмҥэ иккис туруупка булуллубута. Кэлин трубка “Нюрбинская” диэн ааттаммыта. 4 ый устата саҥа туруупканы чинчийэргэ үлэлээбиппит. Сайын буровойдар бары консервацияҕа турбуттара. Биһигини шахтаҕа үлэҕэ көһөрбүттэрэ. 4 сыл үлэлээбитим. Онно Макаров Валентин, Перцев Володя, Комогорцев Виталий, Степанов Славик, Иванов Дима, Егоров Кирииһэ, Терентьев Виталий уонна да атын хоһуун үлэһит уолаттары кытта бииргэ алтыһан үлэлээбиппин үчүгэйдик саныыбын. Нюрбинскай ГОК тэриллибитигэр онно көһөн “Урал” массыыналарга суоппардаабытым. Онтон “Катерпиллар” самосвалга үлэлээбитим. 2002 сылга доруобуйам кыайбакка Накыынтан уурайбытым. (Долотов Иннокентий Дмитриевич ахтыыта.2021 сыл ыам ыйа.)