Дмитриев Афанасий Николаевич

Мин, Дмитриев Афанасий Николаевич, 26.12.1995 сыллаахха Ботуобуйа геологоразведывательнай экспедиция Чайдахскай партияҕа тракторист бульдозериһынан 15 хонуктаах вахтовай үлэҕэ үлэлии киирбитим. Номнуо 25 сыл ааһа охсубут. Онон сорох сыыппараларбын кыратык сыыһарым буолуо. Бастаан Ньурбаттан тохсунньу ый 21 дуу 22 дуу күннэригэр бөртөлүөтүнэн Мииринэй куоракка үлэлиир партиябытыгар таарыйан испиэс таҥас ылан барбыппыт. Биһиги икки бастакы туочукаҕа хаалбыппыт. Миигин кытта буровик көмөлөһөөччүтэ Толя диэн бааһынай уол баар этэ. Бастакы туочукабытыгар биир нэдиэлэ буолбуппут. Бастаан тиийэрбитигэр Үөһээ Бүлүү киһитэ ( Гольдеров Анатолий диэн быһыылаах этэ) үчүгэй саха уола геологынан үлэлии сылдьар этэ. Бастаан тиийбит дьон билбэппит элбэх этэ. Ону лоп-бааччы этэн, сүбэлээн биэрээччи. Биригээдэ дьоно-сэргэтэ да үчүгэйдик көрсүбүттэрэ. Биир Ньурбаттан төрүттээх нуучча уола баара. Үлэлээбиппит биир нэдиэлэ буолан баран 1,5 км. чугас турар сиргэ көспүппүт. Киэһээҥҥи сменалар оннубутун-туойбутун булбуппут кэннэ сири үүттээн саҕалаабыттара уонна сарсыарда 5 чаас саҕана пироп диэн алмаас аргыһын хостоон таһаарбыттара. Дьэ онтон сарсыҥҥы күнтэн Мирнэй куораттан тойоттор кэлиилэрэ-барыылара элбээбитэ. Сити арааһа тохсунньу ый 29-30 күннэрэ буолуохтарын сөп. Булааппытын кытта өссө биир биригээдэ дьонноро кэлбиттэрэ. Быһа холуйан 57 м.80 см.дириҥ эбит. Пироп көстөөтүн кытта сахабыт геологын атын сиргэ көһөрен кэбиспиттэрэ. Ол оннугар Мирнэй куораттан Порошин диэн нуучча геологын аҕалбыттара. Ол да киһи өр буолбатаҕа. Западнай Украинаттан биир киһини үлэлэтэ аҕалбыттара мин уурайыахпар дылы үлэлээн хаалбыта. Аһылыгынан хааччыллыыбыт олус үчүгэй этэ. Баанньыкка сүрэҕэлдьээбэт киһи нэдиэлэҕэ 2-3 суунар этибит. Мин основной үлэм атын туочукаҕа дьиэни көһөрөргө оборудованиены соһор этим. Биһигиттэн чугас 4-5 км. сиргэ баар шахтаҕа босхо бириэмэбэр баран уолаттары кытта көрсөн кэлэрим. Кыыл-сүөл элбэх дойдута эбит этэ. Биһиги сыппыт сирбититтэн Марха өрүс 23 км.этэ. Онтон буровой турбаларын таһар этим. Булбут күммүт сарсыҥҥытыгар тракторбыт клиннээн алдьанан хаалбыта. Оччолорго алдьаммыт тиэхиникэни оҥосторго усулуобуйа суох, барытын аһаҕас халлаан анныгар өрөмүөн оҥороҕун. Бастакы вахта уһуннук да ааспыта. Миигин солбуйа Антоновка уола Долотов Кеша кэлбитэ.